“თვალსაზრისი“ და 80-იანი წლების ფოტოგრაფიული ავანგარდი

1985 წელს, “პერესტროიკის“ რთულ და გამოწვევებით აღსავსე პერიოდში, როდესაც ხელოვნება, საზოგადოებრივი ცხოვრების ყველა სფეროს მსგავსად, სრულ სტაგნაციას განიცდიდა, ქართულ სახელოვნებო ასპარეზზე ახალი ფოტოგრაფიული მოძრაობა-კოლექტივი “თვალსაზრისი” გამოჩნდა. ჯგუფის ყოველი გამოფენა საბჭოთა რეალობის აბსურდული მხარეების მხილება იყო, ცენზურის, თვითცენზურის და დოგმების წინააღმდეგ გადადგმული ნაბიჯი; “თვალსაზრისის“ მთავარი მიზანი კი - თანამედროვე ფოტოგრაფიული ენის შექმნა და დამკვიდრება. „ჩვენ გვინდა ფოტოგრაფია თანამედროვე სახვითი ხელოვნების ავანგარდში ჩავაყენოთ“- ეს იყო “თვალსაზრისის“ დევიზიც.
“თვალსაზრისის“ ერთ-ერთი წამყვანი წევრი, ფოტოგრაფი იური მეჩითოვია. 80-იანი წლებიდან დღემდე, უკანასკნელი 40 წლის მანძილზე, იგი ქართული ფოტოგრაფიის ერთ-ერთ ყველაზე მნიშვნელოვან არტისტად არის აღიარებული. “თვალსაზრისთან“ ერთად, იური მეჩითოვი საბჭოთა პერიოდის დასასრულის ფოტოგრაფიულ ავანგარდში მოექცა, რომელმაც მნიშვნელოვანწილად განსაზღვრა პოსტ საბჭოთა სივრცეში ფოტოგრაფიაში ახალი ტალღის დასაწყისიც.